ஏன் இத்தனை கிறிஸ்தவ சபைகள் உள்ளன?

உலகில் எத்தனையோ சபைகள் உள்ளன; ஒவ்வொன்றுக்கும் வெவ்வேறு பாரம்பரியங்கள், சடங்குகள், நம்பிக்கைகள் உள்ளன. நாம் எந்தச் சபையில் சேர வேண்டும்?

கத்தோலிக்கர், ஆர்த்தடாக்ஸ், பாப்டிஸ்ட், லூத்தரன், மெத்தடிஸ்ட், பிரஸ்பிடேரியன்... டஜன் கணக்கான பெரிய கிறிஸ்தவ சபைப் பிரிவுகள் உள்ளன; பல சபைகள் சடங்குகளிலும் நம்பிக்கைகளிலும் உள்ள வேறுபாடுகளை முன்னிறுத்தி, மற்ற சபைகளிலிருந்து தங்களை விலக்கிக்கொள்கின்றன.

ஒருவர் தனக்கு மிகவும் பொருத்தமான சபையில் சேரும்படி பல்வேறு சபைகள் இருப்பது கிறிஸ்தவத்துக்கு நல்லதா?

கிறிஸ்தவர்களிடையே பிரிவினைகள் அப்போஸ்தலனாகிய பவுலின் நாட்களிலேயே தொடங்கிவிட்டன. கொரிந்துவிலிருந்த சபைக்கு அவர் எழுதியது இதுதான்.

12உங்களில் ஒருவன், “நான் பவுலைப் பின்பற்றுகிறவன்” என்கிறான்; இன்னொருவன், “நான் அப்பொல்லோவைப் பின்பற்றுகிறவன்” என்கிறான்; இன்னும் ஒருவன், “நான் கேபாவைப் பின்பற்றுகிறவன்” என்கிறான்; இன்னும் ஒருவன், “நான் கிறிஸ்துவைப் பின்பற்றுகிறவன்” என்கிறான். இவற்றையே இங்கு நான் குறிப்பிடுகிறேன்.

13கிறிஸ்து பிளவுப்பட்டுள்ளாரா? பவுலா உங்களுக்காகச் சிலுவையில் அறையப்பட்டான்? நீங்கள் பவுலின் பெயரினாலா திருமுழுக்கைப் பெற்றீர்கள்?

( 1 கொரிந்தியர் 1:12-13 )

அப்படியானால், நம்மை நாமே கேட்டுக்கொள்வோம்: பாப்டிஸ்டுகளா நமக்காகச் சிலுவையில் அறையப்பட்டார்கள்? அல்லது நீங்கள் லூத்தருடைய நாமத்தினாலா ஞானஸ்நானம் பெற்றீர்கள்?

சடங்குகளின் நுணுக்கங்கள், திரித்துவத்தின் வரையறை, தேவனுடைய நாமம், யாரை அப்போஸ்தலன் என்று அழைக்கலாம் என்பன போன்றவற்றைப் பற்றிய விவாதங்களில் கிறிஸ்தவர்கள் தொடர்ந்து சண்டையிடுகிறார்கள்... பல தத்துவஞானிகளும் ஞானிகளும் வேதாகமத்தை வாசித்து, சில வசனங்கள் மற்றும் அதிகாரங்களின் அர்த்தத்தைப் பற்றி வாதிடுகிறார்கள். ஆனால் நம் மனித ஞானம் நம்மை எங்கே கொண்டுசெல்லும்?

20ஞானி எங்கே? வேத ஆசிரியர் எங்கே? இந்த உலகத்தின் தர்க்கஞானி எங்கே? உலக ஞானத்தை இறைவன் மூடத்தனமாக்கவில்லையோ?

( 1 கொரிந்தியர் 1:20 )

வேதாகமத்திலிருந்தே எடுக்கப்பட்டவையாக இருந்தாலும், நம் மனித ஞானமும் தனித்துவமான நம்பிக்கைத் தொகுப்புகளும் நமக்கு உதவாது.

25அவ்வேளையில் இயேசு சொன்னதாவது: “பிதாவே, பரலோகத்திற்கும் பூமிக்கும் ஆண்டவரே, ஞானிகளுக்கும், கல்விமான்களுக்கும் இந்தக் காரியங்களை மறைத்து, குழந்தைகளுக்கு நீர் அவற்றை வெளிப்படுத்தியபடியால், உம்மைத் துதிக்கிறேன். ஆம் பிதாவே, இதுவே உமக்குப் பிரியமாய் காணப்பட்டது.

( மத்தேயு 11:25 )

ஒவ்வொரு கிறிஸ்தவ சபைப் பிரிவும் தன் சொந்த நம்பிக்கைகளைக் கடைப்பிடிக்கிறது; சபைகளும் அவற்றின் தலைவர்களும் பின்பற்ற வேண்டிய விதிமுறைகளையும் சடங்குகளையும் ஏற்படுத்துகிறது. ஆனால் இவையெல்லாம் ஒரே விளைவுக்கே வழிநடத்துகின்றன — பிரிவினை. தனித்தனி சபைகள் இருப்பது கிறிஸ்தவத்தை எப்படிப் பாதிக்கிறது?

25இயேசு அவர்களுடைய சிந்தனைகளை அறிந்து அவர்களிடம், “தனக்குத்தானே விரோதமாய் பிளவுபடுகிற எந்த அரசும் பாழாய்ப்போகும். தனக்குத்தானே எதிராகப் பிளவுபடுகிற எந்த ஒரு பட்டணமும் குடும்பமும் நிலைக்காது.

( மத்தேயு 12:25 )

ஒரு இலக்கை நோக்கி நாம் சாலையில் நடக்கும்போது, வழியிலுள்ள தடைகள்மேல் அதிக கவனம் செலுத்துவதில்லை. தடைகளையும் அவற்றைக் கையாளும் பல்வேறு வழிகளையும் விவாதிப்பதில் நாம் கவனம் செலுத்துவதில்லை. மாறாக, இலக்கின்மேல் கண்களை வைத்து முன்னேறிச் செல்கிறோம். சரியாகச் சிலுவை அடையாளம் போடுவது எப்படி, சரியான ஞானஸ்நான முறை எது போன்ற விவாதங்களுக்கும் இதுவே பொருந்தும். இந்த விவாதங்கள் நம்மைப் பிரிக்கவும், முக்கியமானதிலிருந்து நம் கவனத்தைத் திசைதிருப்பவும் இடங்கொடுக்காதீர்கள்.

10பிரியமானவர்களே, நமது கர்த்தராகிய இயேசுகிறிஸ்துவின் பெயரில் உங்களிடம் நான் வேண்டிக்கொள்கிறதாவது: நீங்கள் ஒருவரோடொருவர் ஒத்துப்போகிறவர்களாய் இருந்தால், உங்கள் மத்தியில் பிரிவினைகள் இருக்காது. அத்துடன் நீங்களும், உங்கள் மனதிலும் சிந்தனையிலும் முழுமையாக ஒருமைப்பட்டும் இருப்பீர்கள்.

30இறைவனாலேயே நீங்கள் கிறிஸ்து இயேசுவில் இருக்கிறீர்கள். கிறிஸ்துவே இறைவனிடமிருந்து நமக்காக வந்த ஞானம். அவரே நம்முடைய நீதியும், பரிசுத்தமும், மீட்புமாயிருக்கிறார்.

( 1 கொரிந்தியர் 1:10,30 )

அப்படியானால், நாம் எந்தச் சபையிலும் சேரவே கூடாதா? இல்லை. ஒரு சபையில் சேருவது, பிரசங்கத்தின் மூலம் தேவனுடைய வார்த்தையைக் கற்றுக்கொள்ள உங்களுக்கு உதவுகிறது.

21உலகம் தம் ஞானத்தால் இறைவனை அறியமுடியாதபடி, இறைவன் தமது ஞானத்தில் இதைச் செய்திருக்கிறார். எனவே மூடத்தனமாய்த் தோன்றுகிற எங்கள் பிரசங்கத்தினால் விசுவாசிக்கிறவர்களை இரட்சிக்க இறைவன் விருப்பங்கொண்டார்.

( 1 கொரிந்தியர் 1:21 )

நினைவில் கொள்ளுங்கள்: சபை என்பது ஒரு கட்டிடம் அல்ல, சபை என்பது மக்கள். தேவனுடைய ஜனங்களும் தேவனுடைய ஆலயமும்

16நீங்கள் இறைவனின் ஆலயமாயிருக்கிறீர்கள் என்றும், இறைவனுடைய ஆவியானவர் உங்களுக்குள் குடிகொண்டிருக்கிறார் என்றும் உங்களுக்குத் தெரியாதா?

( 1 கொரிந்தியர் 3:16 )

சபையின் அங்கத்தினராக, உங்கள் சொந்த வாழ்க்கைக்கும் இருதயத்துக்கும் ஆத்துமாவுக்கும் உரிய சரியான அஸ்திபாரமாகிய இயேசு கிறிஸ்துவை நீங்கள் காத்து உறுதிப்படுத்த வேண்டும்.

11ஏற்கெனவே போடப்பட்ட அஸ்திபாரத்தைத் தவிர, வேறு அஸ்திபாரத்தைப் போட ஒருவனாலும் முடியாது. அந்த அஸ்திபாரம் இயேசுகிறிஸ்துவே.

( 1 கொரிந்தியர் 3:11 )

குறிப்பிட்ட சபைப் பிரிவுகளையோ தனிப்பட்ட தலைவர்களையோ பின்பற்றுவதைத் தவிர்த்திடுங்கள். இந்த உலகத்தின் மக்களைப் போல நடந்துகொள்ளாதீர்கள்.

4“நான் பவுலைப் பின்பற்றுகிறவன்” என்று ஒருவன் சொல்லும்போது, மற்றவன், “நான் அப்பொல்லோவைப் பின்பற்றுகிறவன்” என்கிறான். அப்படியென்றால், நீங்கள் சாதாரண மனித இயல்பின்படிதானே நடந்துகொள்கிறீர்கள்.

5அப்பொல்லோ யார்? பவுல் யார்? உங்களை விசுவாசத்திற்கு வழிநடத்திய கர்த்தரின் ஊழியர்கள்தானே. அப்படியே ஒவ்வொருவரும் கர்த்தர் தங்களுக்குக் கொடுத்த பணியையே அவர்கள் செய்கிறார்கள். 6நான் விதையை நட்டேன், அப்பொல்லோ தண்ணீர் ஊற்றினான், ஆனால் இறைவனே அதை வளரச்செய்தார். 7எனவே நடுகிறவனும், தண்ணீர் ஊற்றுகிறவனும் முக்கியமானவர்களல்ல. அவற்றை வளரச்செய்கிற இறைவன் மட்டுமே முக்கியமானவர்.

( 1 கொரிந்தியர் 3:4-7 )

எப்போதும் முக்கியமானதின்மேல் — ஒரே ஜீவனுள்ள தேவனுடைய மெய்யான சாயலாகிய கிறிஸ்து இயேசுவின்மேல் — கவனம் செலுத்துவதில் விழிப்பாயிருங்கள்.

21எனவே, இனிமேல் மனிதர்களைக்குறித்துப் பெருமைகொள்ள வேண்டாம்! எல்லாக் காரியங்களும் உங்களுடையவைதான். 22பவுலானாலும், அப்பொல்லோவானாலும், கேபாவானாலும், அவர்கள் எல்லோரும் உங்களுடையவர்களே. இந்த உலகமானாலும், வாழ்வானாலும், மரணமானாலும், நிகழ்காலமானாலும், எதிர்காலமானாலும், அவையெல்லாமே உங்களுடையதே. 23நீங்கள் கிறிஸ்துவுக்குரியவர்கள், கிறிஸ்து இறைவனுக்குரியவர்.

( 1 கொரிந்தியர் 3:21-23 )