نېمە ئۈچۈن خرىستىيان چېركاۋلىرى بۇنچە كۆپ؟

دۇنيادا ھەر بىرىنىڭ ئۆزگىچە ئەنئەنىلىرى، مۇراسىملىرى ۋە ئېتىقادلىرى بار نۇرغۇن چېركاۋلار بار. بىز قايسىسىغا قوشۇلۇشىمىز كېرەك؟

كاتولىك، پراۋوسلاۋىيە، باپتىست، لۇتېران، مېتودىست، پرېسبىتېرىيان... ئونلىغان چوڭ خرىستىيان مەزھەپلىرى بار، نۇرغۇن چېركاۋلار مۇراسىم ۋە ئېتىقادتىكى پەرقلەرنى گەۋدىلەندۈرۈپ، ئۆزىنى باشقا چېركاۋلاردىن ئايرىۋالىدۇ.

ھەر كىم ئۆزىگە ئەڭ ماس كېلىدىغان چېركاۋغا قوشۇلالىشى ئۈچۈن ئوخشىمىغان چېركاۋلارنىڭ بولۇشى خرىستىيانلىق ئۈچۈن ياخشىمۇ؟

خرىستىيانلار ئارىسىدىكى بۆلۈنۈشلەر ئەلچى پاۋلۇسنىڭ دەۋرىدىلا باشلانغان. ئۇ كورىنت شەھىرىدىكى چېركاۋغا مۇنداق يازغان.

دېمەكچى بولغىنىم شۇكى، ھەربىرىڭلار: «مەن پاۋلۇسنىڭ تەرەپدارى»، «مەن ئاپوللوسنىڭ تەرەپدارى»، «مەن كېفاسنىڭ تەرەپدارى» ۋە «مەن مەسىھنىڭ تەرەپدارى» دەۋاتىسىلەر. ئەجەبا، مەسىھ بۆلۈنگەنمىكەن؟ سىلەر ئۈچۈن كرېستلەنگەن ئادەم پاۋلۇسمىدى؟ سىلەر پاۋلۇسنىڭ نامىغا چۆمۈلدۈرۈلدۈڭلارمۇ؟

( كورىنتۇسلۇقلارغا «1» 1:12-13 )

ئۇنداقتا ئۆز-ئۆزىمىزدىن سوراپ باقايلى: بىز ئۈچۈن كرېستكە مىخلانغانلار باپتىستلارمۇ؟ ياكى سىلەر لۇتېرنىڭ نامىدا چۆمۈلدۈرۈلدۈڭلارمۇ؟

خرىستىيانلار مۇراسىملارنىڭ تەپسىلاتلىرى، ئۈچ بىرلىكنىڭ تەبىرى، خۇدانىڭ نامى، كىمنى ئەلچى دەپ ئاتاشقا بولىدىغانلىقى قاتارلىق مەسىلىلەر ئۈستىدىكى مۇنازىرىلەردە توختىماي تالىشىدۇ... نۇرغۇن پەيلاسوپلار ۋە دانا كىشىلەر مۇقەددەس كىتابنى ئوقۇپ، بەزى ئايەت ۋە بابلارنىڭ مەنىسى ھەققىدە مۇنازىرە قىلىدۇ. لېكىن ئىنسانىي دانالىقىمىز بىزنى نەگە ئېلىپ بارالايدۇ؟

ئۇنداقتا، دانىشمەنلەر قېنى؟ تەۋرات ئۆلىمالىرى قېنى؟ بۇ دۇنيادىكى بەس-مۇنازىرە قىلغۇچىلار قېنى؟ خۇدا بۇ دۇنيادىكى دانالىقنى ئەخمەقلىق دەپ كۆرسەتكەن ئەمەسمۇ؟

( كورىنتۇسلۇقلارغا «1» 1:20 )

ئىنسانىي دانالىقىمىز ۋە ئۆزگىچە ئېتىقاد سىستېمىلىرىمىز، ھەتتا مۇقەددەس كىتابتىن ئېلىنغان بولسىمۇ، بىزگە ياردەم بېرەلمەيدۇ.

شۇ ۋاقىتلاردا، ئەيسا بۇ ئىشلارغا قاراپ مۇنداق دېدى: ــ ئاسمان-زېمىن ئىگىسى ئى ئاتا! سەن بۇ ھەقىقەتلەرنى دانىشمەن ۋە ئەقىللىقلاردىن يوشۇرۇپ، سەبىي بالىلارغا ئاشكارىلىغانلىقىڭ ئۈچۈن ساڭا مەدھىيىلەر ئوقۇيمەن!

( ماتتا 11:25 )

ھەر بىر خرىستىيان مەزھىپى ئۆز ئېتىقادلىرىنى قوبۇل قىلىدۇ، چېركاۋلار ۋە ئۇلارنىڭ يېتەكچىلىرى ئەمەل قىلىدىغان قائىدە ۋە مۇراسىملارنى بېكىتىدۇ. لېكىن بۇلارنىڭ ھەممىسى بىرلا نەتىجىگە ئېلىپ بارىدۇ — بۆلۈنۈش. ئايرىم-ئايرىم چېركاۋلارنىڭ بولۇشى خرىستىيانلىققا قانداق تەسىر كۆرسىتىدۇ؟

لېكىن ئۇ ئۇلارنىڭ نېمە ئويلاۋاتقانلىقىنى بىلىپ ئۇلارغا مۇنداق دېدى: ــ ئۆز ئىچىدىن بۆلۈنۈپ ئۆزئارا سوقۇشقان ھەرقانداق پادىشاھلىق ۋەيران بولىدۇ؛ ھەرقانداق شەھەر ياكى ئائىلە ئۆز ئىچىدىن بۆلۈنۈپ ئۆزئارا سوقۇشسا زاۋاللىققا يۈز تۇتىدۇ.

( ماتتا 12:25 )

بىز بىر نىشانغا قاراپ يولدا ماڭغاندا، يولىمىزدىكى توسالغۇلارغا بەك كۆپ دىققەت قىلمايمىز. توسالغۇلار ۋە ئۇلارنى يېڭىشنىڭ ئوخشىمىغان ئۇسۇللىرىنى مۇزاكىرە قىلىشقا ئەھمىيەت بەرمەيمىز. ئەكسىچە، كۆزىمىزنى نىشانغا تىكىپ ئالغا ئىلگىرىلەيمىز. كرېست بەلگىسىنى قانداق توغرا قىلىش، چۆمۈلدۈرۈشنىڭ توغرا تەرتىپى قاتارلىق مۇنازىرىلەرگىمۇ بۇ ئوخشاشلا ماس كېلىدۇ. بۇ مۇنازىرىلەرنىڭ بىزنى بۆلۈۋېتىشىگە ۋە ئەڭ مۇھىم ئىشتىن دىققىتىمىزنى چېچىۋېتىشىگە يول قويماڭلار.

ئەمدى مەن سىلەردىن رەببىمىز ئەيسا مەسىھنىڭ نامى بىلەن شۇنى ئۆتۈنىمەنكى، ئى قېرىنداشلار، گېپىڭلار بىر يەردىن چىقسۇن، ئاراڭلاردا بۆلگۈنچىلىك بولمىسۇن، بىر پىكىردە، بىر نىيەتتە كامىل بىرلەشتۈرۈلۈڭلار؛ ئەمما ئۇنىڭ تەرىپىدىن سىلەر مەسىھ ئەيسادا تۇرىسىلەر؛ ئۇ بىزگە خۇدادىن كەلگەن دانالىق، ھەققانىيلىق، پاك-مۇقەددەسلىك ۋە ھۆرلۈك-ئازادلىق قىلىنغاندۇر؛

( كورىنتۇسلۇقلارغا «1» 1:10,30 )

ئۇنداقتا، ھېچقانداق چېركاۋغا قوشۇلماسلىقىمىز كېرەكمۇ؟ ياق. چېركاۋغا قوشۇلۇش ۋەز-نەسىھەتلەر ئارقىلىق خۇدانىڭ سۆزىنى ئۆگىنىشىڭىزگە ياردەم بېرىدۇ.

چۈنكى خۇدا دانالىقى بىلەن بېكىتكىنى بويىچە، دۇنيا ئۆز دانالىقى ئارقىلىق خۇدانى تونۇمىغان، شۇڭا خۇدا ئەخمىقانە دەپ قارالغان، جاكارلىنىۋاتقان سۆز-كالام ئارقىلىق ئۇنىڭغا ئىشەنگۈچىلەرگە نىجاتلىق يەتكۈزۈشنى لايىق كۆرگەن.

( كورىنتۇسلۇقلارغا «1» 1:21 )

ئېسىڭىزدە بولسۇنكى، چېركاۋ بىنا ئەمەس، چېركاۋ — كىشىلەردۇر. خۇدانىڭ خەلقى ۋە خۇدانىڭ ئىبادەتخانىسى

ئەجەبا، ئۆزۈڭلارنىڭ خۇدانىڭ ئىبادەتخانىسى ئىكەنلىكىڭلارنى ۋە خۇدانىڭ روھىنىڭ سىلەردە تۇرغانلىقىنى بىلمەمسىلەر؟

( كورىنتۇسلۇقلارغا «1» 3:16 )

چېركاۋ ئەزاسى بولۇش سۈپىتىڭىز بىلەن، ئۆز ھاياتىڭىز، قەلبىڭىز ۋە روھىڭىز ئۈچۈن توغرا ئۇل بولغان ئەيسا مەسىھنى ساقلىشىڭىز ۋە مۇستەھكەملىشىڭىز كېرەك.

چۈنكى سېلىنغان ئۇلنى، يەنى ئەيسا مەسىھتىن باشقا ھېچقانداق ئۇلنى سېلىشقا بولمايدۇ.

( كورىنتۇسلۇقلارغا «1» 3:11 )

مەلۇم مەزھەپلەرگە ياكى ئايرىم يېتەكچىلەرگە ئەگىشىشتىن ساقلىنىڭ. بۇ دۇنيانىڭ كىشىلىرىدەك ئىش قىلماڭ.

چۈنكى بىرسى «مەن پاۋلۇس تەرەپدارى»، باشقا بىرسى «مەن ئاپوللوس تەرەپدارى» دېسە، سىلەر پەقەت ئىنسانلارنىڭ يولىدا ماڭغان بولۇپ قالمامسىلەر؟ ئاپوللوس دېگەن كىم؟ پاۋلۇس كىم ئىدى؟ بىز پەقەت سىلەرنىڭ ئېتىقادىڭلارغا ۋاسىتىچى بولدۇق، خالاس؛ ھەربىرىمىز پەقەت رەب بىزگە تەقسىم قىلغىنى بويىچە ۋەزىپە ئادا قىلىدىغان خىزمەتكارلار، خالاس، شۇنداق ئەمەسمۇ؟ مەن تىكتىم، ئاپوللوس سۇغاردى؛ ئەمما ئۆستۈرگۈچى بولسا خۇدادۇر. شۇڭا تىككۈچى ھېچنېمىگە ھېساب ئەمەس، سۇغارغۇچىمۇ ھېچنېمىگە ھېساب ئەمەس، پەقەت ئۆستۈرگۈچى خۇدا ئۆزى ھەممىدۇر.

( كورىنتۇسلۇقلارغا «1» 3:4-7 )

ھەمىشە ئەڭ مۇھىم ئىشقا — بىردىنبىر تىرىك خۇدانىڭ ھەقىقىي سىماسى بولغان مەسىھ ئەيساغا دىققەت قىلىشنى ئۇنتۇماڭ.

شۇڭا ھېچكىم ئىنسان دېگەنلەرنى پەخىرلىنىپ داڭلىمىسۇن؛ چۈنكى ھەممە مەۋجۇداتلار سىلەرگە تەۋەدۇر؛ پاۋلۇس بولسۇن، ئاپوللوس بولسۇن، كېفاس بولسۇن، دۇنيا-جاھان بولسۇن، ھايات بولسۇن، ئۆلۈم بولسۇن، ھازىرقى ئىشلار بولسۇن، كەلگۈسى ئىشلار بولسۇن، ھەممىسى سىلەرگە مەنسۇپتۇر؛ سىلەر بولساڭلار مەسىھنىڭ، مەسىھ بولسا خۇدانىڭكىدۇر.

( كورىنتۇسلۇقلارغا «1» 3:21-23 )