ང་འཇིག་རྟེན་འདིར་མི་འཚམ།

“ང་ཅི་ཞིག་བྱས་ཀྱང་ཕྱི་མི་ཞིག་ཏུ་ལུས་ཡོད། ཉིན་རེ་བཞིན་ང་ལ་སུས་ཀྱང་དགའ་པོ་མི་བྱེད་པ་དང་། སུས་ཀྱང་ང་མི་དགོས་པ་ངེས་པར་ཤེས་ཀྱི་ཡོད། ལས་ཀའི་ཐོག་མྱུར་དུ་མཐོ་རིམ་ལ་འཕར་བ། འཛུམ་མདངས་ལྡན་པའི་ཁྱིམ་ཚང་དང་། ཁོང་ཚོར་གུས་བཀུར་བྱེད་པའི་ལས་རོགས་ཡོད་པའི་མི་རྣམས་ཀྱི་ཁྲོད་དུ་ང་སྐྱོ་པོ་ཡོད། ང་མི་འཚམ་པའི་འཇིག་རྟེན་འདིའི་ནང་ང་ཚོའི་མཐའ་འཁོར་གྱི་སྐྱིད་པོའི་གདོང་པ་དེ་དག་ལ་ད་ནི་བཟོད་མི་ཐུབ།...” - ཚོར་བ་འདི་ཁྱེད་ལ་ངོ་ཤེས་པ་ལྟར་སྣང་ངམ།

ཁྱེད་གཅིག་པུ་མིན། ཁྱེད་དང་འདྲ་བའི་ང་ཚོ་མི་ས་ཡ་མང་པོ་ཡོད། ང་ཚོའི་ཁྲོད་ནས་མང་པོ་ཞིག་འཇིག་རྟེན་འདིའི་མི་མ་ཡིན།

ཡང་སྐྱབས་མགོན་ཡེ་ཤུས་འདི་སྐད༌དུ། གལ་ཏེ་འཇིག་རྟེན་གྱི་མི་རྣམས་ཁྱོད་ཅག་ལ་སྡང་བ་ཡིན༌ན། ཁྱོད་རྣམས་ལ་མ་སྡང་བའི་སྔོན་དུ་ང་རང་ལ་སྡང་བ་ཁྱོད་རྣམས་ཀྱིས་ཤེས་དགོས། གལ་ཏེ་ཁྱོད་རྣམས་འཇིག་རྟེན་ལ་གཏོགས་པ་ཡིན༌ན། འཇིག་རྟེན་གྱི་མི་རྣམས་ཀྱིས་རང་ལ་གཏོགས་པ་བཞིན་ཁྱོད་ཅག་ལ་བྱམས་ཤིང་བརྩེ་བ་ཡིན༌མོད། འོན་ཀྱང་ཁྱོད་རྣམས་འཇིག་རྟེན་ལ་མི་གཏོགས་ཤིང་། ངས་འཇིག་རྟེན་འདི་ལས་ཁྱོད་རྣམས་བདམས་པ་ཡིན་པས་འཇིག་རྟེན་གྱི་མི་རྣམས་ཁྱོད་ཅག་ལ་སྡང༌བ་ཡིན།

( ཡོ་ཧ་ནན། 15:18-19 )

འཇིག་རྟེན་འདིས་ང་ཚོར་ཅི་ཞིག་སྤྲོད་ཀྱི་ཡོད་དམ། རང་ཉིད་གལ་ཆེ་ཞིང་ཁྱད་པར་ཅན་ཡིན་པའི་ཚོར་བ་དང་། དངུལ་འཚོལ་ནུས་པ། རླངས་འཁོར་དང་ཁང་པ་ཆེན་པོ་ཉོ་ཐུབ་པ་དེ་ཡིན་ནམ། གྲོགས་པོ་ཚོས་ཁྱེད་ངོས་ལེན་བྱས་པ་དང་ཁོང་ཚོའི་ཁྲོད་དུ་ཁྱེད་ཀྱི་གོ་གནས་ཁྱད་པར་ཅན་ཡིན་པ་ར་སྤྲོད་པའི་བསྔགས་བརྗོད་ཐོབ་པ་དེ་ཡིན་ནམ། ཡང་ན་གཞན་ལས་ལྷག་པའི་ཚོར་བ་དེ་ཡིན་ནམ། མི་གཞན་གྱིས་ཁྱེད་ལ་ཞབས་ཞུ་བྱེད་པའི་དགའ་སྤྲོ་ཡིན་སྲིད་དམ། ཡང་ན་ཁྱེད་ཀྱིས་ཉོས་ནས་རྩེད་མོ་རྩེ་ཐུབ་པའི་གློག་ཆས་དེ་དག་ཙམ་ཡིན་ནམ། ཡང་ན་འཇིག་རྟེན་གྱིས་སྤྲོད་པ་ནི་ཀུང་སི་ཆེན་པོ་ཞིག་གི་ལས་ཀ་ཡིན་ཞིང་། དེར་ཁྱེད་ཀྱིས་གཞན་གྱི་ལས་རིམ་འཛུགས་པར་རོགས་རམ་བྱེད་པ་དང་། ཁྱེད་ཀྱི་འོག་གི་ལས་བྱེད་རྣམས་ཀྱི་གོ་གནས་སྤར་བའམ་ཁོང་ཚོའི་ལག་རྩལ་གྱི་དཀའ་ངལ་ལ་རོགས་རམ་བྱས་ནས་ཁྱེད་ཀྱི་སེམས་རྒྱ་ཆེ་བ་སྟོན་པ་དེ་ཡིན་ནམ། གནམ་གྲུའི་རིམ་པ་དང་པོར་འགྲུལ་བཞུད་བྱེད་པ་དང་ཚོང་ལས་ཀྱི་ཚོགས་འདུར་ཞུགས་པ་ཡིན་ནམ། རིན་གོང་ཆེ་བའི་ཟ་ཁང་དུ་བརྒྱབ་པའི་རང་གི་པར་རིས་སྤྱི་ཚོགས་དྲ་རྒྱར་འགྲེམས་སྤེལ་བྱེད་པ་ཡིན་ནམ།

ཧ་ལས་པ་ཞིག་མ་རེད་དམ། དེ་འདྲ་སུས་མི་འདོད། རེད། དངོས་གནས་དྲང་པོར་བཤད་ན། དེ་ནི་སེམས་འཕྲོག་པ་ཞིག་ཡིན་པ་ཁས་ལེན་དགོས། འོན་ཀྱང་མྱུར་བུལ་གང་ལྟར་ཡང་། འཇིག་རྟེན་འདིས་སྤྲོད་པ་གང་ཡང་ང་ཚོའི་ནང་གི་སྟོང་པ་དང་ཁེར་རྐྱང་ཁ་སྐོང་མི་ཐུབ་པ་ང་ཚོས་རྟོགས་ངེས་ཡིན། དེ་དུས་ང་ཚོས་ལོ་མང་པོར་འཇིག་རྟེན་གྱི་རྗེས་སུ་འབྲངས་ཤིང་གཏེར་རྫུན་མ་དེའི་འདོད་ཆགས་ཀྱི་རྗེས་སུ་འབྲངས་པས་མགོ་སྐོར་ཐེབས་པ་ཚོར་ཏེ། དུས་ཡུན་དེ་ཚང་མར་ང་ཚོར་རིན་ཐང་ཆེ་བ་ལྟར་སྣང་བའི་གྲོགས་པོའི་བསྔགས་བརྗོད་དེ་ནི་ཕྲག་དོག་དང་ཞེ་སྡང་ལ་ཁ་གདོང་བཀབ་པ་ཙམ་ལས་མེད་པ་ད་གཟོད་རྟོགས་ཀྱི་རེད།

ཡེ་ཤུ་ས་གཞིའི་སྟེང་དུ་བབས་ནས་མི་རྣམས་ལ་རང་དབང་སྤྲོད་དུས། ཁོང་ཚོའི་ཁྲོད་ནས་མང་པོས་ཁོང་ལ་དད་པ་བྱས་ཀྱང་། སུས་ཀྱང་དེ་མི་མང་གི་མདུན་དུ་ཁས་ལེན་པའི་སྙིང་སྟོབས་མ་བྱུང་སྟེ།

རྒྱུ་མཚན་ནི་མི་དེ་རྣམས་དཀོན་མཆོག་གི་བསྟོད་བསྔགས་ལས་ཀྱང་མིའི་བསྟོད་བསྔགས་ལ་ལྷག་པར་དགའ་བས༌སོ།།

( ཡོ་ཧ་ནན། 12:43 )

ད་ང་ཚོ་ཡང་མི་ཡི་བསྔགས་བརྗོད་དང་ངོས་ལེན་ལ་བཅིངས་ཡོད། གསེར་གྱི་བྱ་སྒམ་ནང་དུ་བཅིངས་པའི་རང་དབང་གི་བྱ། སྙོད་ཟས་ཀྱིས་དྲངས་པའི་ཉ། གཞན་གྱི་བསམ་ཚུལ་ལ་འཇིགས་པས་བཅིངས་པ།...

མི་ལ་འཇིགས་ན་རྙི་ནང༌འཚུད། །ཡ་ཝཱེར་བརྟན་པར་ཉེ་ཞོ༌མེད།།

( ལེགས་བཤད། 29:25 )

རེད། ང་ཚོས་འཇིག་རྟེན་འདིར་འཚམ་པར་འབད་རྩོལ་བྱེད་མི་དགོས། ང་ཚོས་འཇིག་རྟེན་འདིའི་རིན་ཐང་ལ་འདོད་པའི་རྗེས་སུ་འབྲངས་ནས་རང་གི་སེམས་ངལ་བ་དང་སྙིང་ཟད་པ་བཟོ་མི་དགོས། སྣུམ་རྫས་ཀྱི་རྒྱན་ཆ་རྫུན་མ་ནམ་ཡང་རྡོ་རྗེ་ཕ་ལམ་ངོ་མ་དང་མཚུངས་མི་ཐུབ་པ་ལྟར། འཇིག་རྟེན་འདིས་སྤྲོད་པ་རྣམས་ཀྱིས་ང་ཚོའི་སྙིང་གི་སྟོང་པ་ནམ་ཡང་ཁ་སྐོང་མི་ཐུབ། དེས་ང་ཚོས་ཚོར་བའི་སྐོམ་དད་ནམ་ཡང་སེལ་མི་ཐུབ།

འཇིག་རྟེན་འདི་དང་འཇིག་རྟེན་གྱི་དངོས་པོ་ཀུན་ལ་ཞེན་ཆགས༌པར་མི་བྱའོ། །གལ་ཏེ། མི་སུ་ཞིག་འཇིག་རྟེན་ལ་ཞེན་ཆགས་པར་གྱུར་ན། མི་དེའི་སེམས་སུ་ཡབ་ལ་གཅེས་པའི་སེམས་ནི་ཡོད་པ་མ་ཡིན་ནོ།།

( ཡོ་ཧ་ནན་དང་པོ། 2:15 )

བྱམས་པ་ངོ་མ་དང་། ཤེས་རྟོགས་ངོ་མ། ཚེ་སྲོག་ཏུ་འགྲོ་བའི་ལམ་ངོ་མའི་འབྱུང་ཁུངས་ཞིག་ཡོད་དེ། དེ་ནི་འཐུང་རྗེས་ང་ཚོ་ནམ་ཡང་སྐོམ་མི་སྲིད་པའི་ཆུ་མིག་ཅིག་ཡིན།

འོན་ཀྱང་སུ་ཞིག་གིས་ངས་གནང་བའི་ཆུ་འཐུངས་ན་ནམ་ཡང་སྐོམ་པར་མི་འགྱུར། ངས་གནང་བའི་ཆུ་འདི་མི་སུ་ཞིག་གི་སེམས་སུ་ཆུ་མིག་འཕྱུར་བ་ལྟ་བུ་ཞིག་ཏུ་གྱུར་ཏེ་མཐའ་མེད་པའི་ཚེ་སྲོག་འཐོབ་པར་བྱེད་ཅེས་གསུངས་སོ།།

( ཡོ་ཧ་ནན། 4:14 )

ཁྱེད་ཀྱིས་ཡེ་ཤུ་མ་ཤི་ཀ་ངོ་ཤེས་ཀྱང་སྲིད། མི་ཤེས་ཀྱང་སྲིད། (ཁྱེད་ཀྱིས་མཚན་དེ་ཐོས་མྱོང་ཡོད་སྲིད་ཀྱང་།) ཁོང་སུ་ཡིན་པ་དང་གང་ནས་ཡིན་པ་མི་ཤེས་སྲིད། འོན་ཀྱང་ང་ཚོས་ལམ་སང་མཐོང་ཐུབ་པའི་དོན་གཅིག་ཡོད་དེ། ཁོང་ནི་འཇིག་རྟེན་འདི་ནས་མ་ཡིན།

ངས་ཁྱེད་ཀྱི་བཀའ་ཁོ་རྣམས་ལ་བསྩལ་ཅིང་འཇིག་རྟེན་གྱི་མི་དག་ཁོ་རྣམས་ལ༌སྡང༌། རྒྱུ་མཚན་ནི་ང་རང་འཇིག་རྟེན་ལ་མི་གཏོགས་པ༌བཞིན། ཁོ་རྣམས་ཀྱང་འཇིག་རྟེན་ལ་མི་གཏོགས་པའི་ཕྱིར༌རོ།།

( ཡོ་ཧ་ནན། 17:14 )

ཁོང་གིས་འཇིག་རྟེན་འདིས་སྤྲོད་པ་དེ་དག་ལེན་གྱི་མེད།

ཡང་བདུད་ཀྱིས་སྐྱབས་མགོན་ཡེ་ཤུ་རི་ཤིན་ཏུ་མཐོན་པོ་ཞིག་ཏུ་ཁྲིད༌དེ། འཇིག་རྟེན་གྱི་རྒྱལ་ཁམས་ཡོངས་དང་དེ་དག་གི་དཔལ་དང་འབྱོར་བ་ཐམས་ཅད་ཁོང་ལ་བསྟན་ཏེ་ན༌རེ། གལ༌ཏེ། ཁྱེད་ཀྱིས་པུས་མོ་སར་བཙུགས་ནས་བདག་ལ་ཕྱག་བཙལ་ན། བདག་གིས་འདི་ཐམས་ཅད་ཁྱེད་ལ་འབུལ་བར་བྱ་ཞེས་སྨྲས་པ༌ལ། ཡང་སྐྱབས་མགོན་ཡེ་ཤུས་འདི་སྐད༌དུ། བདུད་སཱ་ཏན་ཁྱོད་ཕར་སོང༌ཞིག ཅིའི་ཕྱིར་ཞེ༌ན། གསུང་རབ་ཀྱི་མདོ་ལས་ཇི་སྐད༌དུ། ཁྱོད་ཀྱིས་གཙོ་བོ་སྟེ་རང་གི་དཀོན་མཆོག་ལ་ཕྱག་འཚལ་ཞིང་ཁོང་གཅིག་པུར་བསྙེན་བཀུར་བྱེད་དགོས་ཞེས་བཀོད་འདུག་ཅེས་གསུངས༌སོ།།

( མད༌ཐཱ། 4:8-10 )

ང་ཚོས་རང་ཉིད་ཕན་མེད་དང་། བོར་བཞག་ཐེབས་པ། སྟོང་པ། འཇིག་རྟེན་འདིའི་མི་མ་ཡིན་པ་ལྟར་ཚོར་དུས། ཡེ་ཤུས་ང་ཚོར་སྤྲོད་པའི་ཆུ་དེ་འཐུང་ཐུབ། དེས་ང་ཚོར་དགོས་པའི་ཤེས་རྟོགས་སྤྲོད་པས། ང་ཚོ་ནམ་ཡང་ཡང་བསྐྱར་སྐོམ་མི་སྲིད། ཁོང་ནི་མི་རྣམས་ཀྱིས་ཚེ་གང་བོར་འཚོལ་བཞིན་པའི་གཏེར་ངོ་མར་ཁྲིད་པའི་ལམ་ཡང་དག་པ་དེ་ཡང་ཡིན།

སྐྱབས་མགོན་ཡེ་ཤུས་འདི་སྐད༌དུ། བདག་ནི་ལམ་དེ་ཉིད་དང༌། བདེན་པ༌ཉིད། ཚེ་སྲོག་ཉིད་བཅས་ཡིན༌ནོ། །ང་རང་མ་བརྒྱུད་པར་མི་སུའང་ཡབ་ཀྱི་དྲུང་དུ་འགྲོ་མི་ཐུབ་བོ།།

( ཡོ་ཧ་ནན། 14:6 )

ང་ཚོ་ཚང་མར་རང་ཉིད་ཁྱད་པར་ཅན་ཡིན་པ་དང་། ང་ཚོ་ཇི་བཞིན་པར་བྱམས་པ་ཐོབ་པའི་ཚོར་བ་དགོས་པ་ནི་རང་བཞིན་གྱིས་ཡིན། ང་ཚོ་དཀོན་མཆོག་གི་གཟུགས་བརྙན་ལྟར་བཀོད་པ་ཡིན་པ་ཚང་མས་ཤེས། འོན་ཀྱང་དཀོན་མཆོག་གི་སྤྱན་སྔར་ང་ཚོ་ཇི་ཙམ་ཁྱད་པར་ཅན་ཡིན་པ་ང་ཚོས་སླ་པོར་བརྗེད།

གང་ལ་ཞེ་ན། ཁྱོད་ནི་ངའི་མིག་ལམ་དུ་ཤིན་ཏུ་རྩ་ཆེ་ཞིང་གལ་ཆེན་པོ་ཡིན་པས། ངས་ཁྱོད་གཅེས་སུ་འཛིན་ཞིང་། ངས་ཁྱོད་ཀྱི་ཚབ་ཏུ་མི་གཞན་དང་། མི་རིགས་གཞན་ཁྱོད་ཀྱི་ཚེ་སྲོག་ལ་བརྗེས་པ་ཡིན།

( ཡེ་ཤ་ཡཱ། 43:4 )

ད་དུང་ང་ཚོར་རང་གི་མི་ཚེའི་ནང་ཕན་ཐོགས་པའི་བྱ་བ་ཞིག་བྱེད་འདོད་དང་། ཕན་མེད་ཀྱི་ཚོར་བ་དེ་སེལ་འདོད་ཀྱི་འདོད་པ་དྲག་པོ་ཡོད་སྲིད། དེའི་ཆེད་དུ་ང་ཚོར་གལ་ཆེ་ཤོས་ནི་རྙེད་པ་ཡིན་པ་གོ་དགོས… ང་ཚོའི་གནམ་གྱི་ཡབ་ཀྱིས་གཞན་ཚང་མ་བཞག་ནས་ལུག་བརླག་པ་ཁྱེད་རང་འཚོལ་བར་ཕེབས་ཀྱི་རེད…

བདག་གིས་ཁྱོད་རྣམས་ལ་བདེན་པར་སྨྲ༌སྟེ། ལུག་དེ་བཙལ་ནས་རྙེད༌ན། བོར་མེད་པའི་ལུག་དགུ་བཅུ་གོ་དགུ་ལས་ཀྱང་ལུག་གཅིག་པོ་དེའི་ཕྱིར་ལྷག་ཏུ་དགའ་བར་འགྱུར༌རོ།།

( མད༌ཐཱ། 18:13 )

ང་ཚོས་རང་གི་ནང་དུ་ཞིབ་ཏུ་བལྟས་ནས་ཕན་མེད་ཀྱི་ཚོར་བ་སེམས་ཁྲལ་བ་འདི་གང་ནས་བྱུང་བ་དང་། ང་ཚོ་གང་དུ་ཁྲིད་བཞིན་པ་ལྟ་དགོས། གལ་ཏེ་ཚོར་བ་དེས་ང་ཚོ་མི་ཡི་ངོས་ལེན་ནམ་བསྔགས་བརྗོད་འཚོལ་དུ་འདེད་ན། དེས་ཁྱེད་ལ་དབང་བསྒྱུར་དུ་མ་འཇུག་གོང་ལ་ཡང་ཡང་བསམ་བློ་ཐོངས། འོན་ཀྱང་ཁྱེད་ཀྱི་ཚོར་བ་དེ་དཀོན་མཆོག་ལ་བྱམས་པའམ། དཀའ་ངལ་གྱི་དུས་སུ་ཁྱེད་ཀྱིས་རོགས་རམ་བྱེད་ཐུབ་པའི་གཞན་ལ་བྱམས་པ་ལས་བྱུང་བ་ཡིན་ན། མདུན་དུ་སྐྱོད། གང་ཡིན་ཟེར་ན། དཀོན་མཆོག་ཁྱེད་དང་མཉམ་དུ་བཞུགས་ཡོད་ཅིང་། ཁོང་ལ་ཁྱེད་ཀྱི་ཆེད་དུ་འཆར་གཞི་ཞིག་ཡོད།

ངས་ཁྱོད་རྣམས་ལ་བཅངས་པའི་བསམ་པ་ནི་ཁྱོད་ཚོར་ཞི་བདེ་འཐོབ་པ་ལས་ཆག་སྒོ་འབྱུང་བ་མིན་པ་ངས་རྟོགས་ཡོད། མ་འོངས་པ་ན་ཁྱོད་རྣམས་ལ་འོད་སྟོང་འབར་བའི་མདུན་ལམ་དང་རེ་བ་ཡོད་པར་བྱའོ་ཞེས་གསུངས་ཏེ། འདི་ནི་དཀོན་མཆོག་ཡ་ཝཱེས་གསུངས་པའོ། །

( ཡེ་རེམ་ཡཱ། 29:11 )

དཀོན་མཆོག་གིས་ཁྱེད་ཀྱི་ཆེད་དུ་འཆར་གཞི་ཅི་ཞིག་བཞག་ཡོད་པ་ད་དུང་ཐག་མ་ཆོད་ན། སྨོན་ལམ་ཙམ་ཞིག་ཞུས… དེ་ནས་མཐའ་འཁོར་ལ་ལྟོས། ཁྱེད་ད་ལྟ་ལམ་ཡང་དག་གི་སྟེང་དུ་ཡོད་སྲིད་དམ།

བདག་གིས་ཁྱོད་རྣམས་ཀྱི་སེམས་ལ་ཞི་བདེ་འཐོབ་པར་བྱེད་ཅིང་རང་ཉིད་ཀྱི་ཞི་བདེའང་ཁྱོད་རྣམས་ལ་གནང༌ཞིང་། བདག་གིས་གནང་བའི་ཞི་བདེ་ནི་འཇིག་རྟེན་མི་ཡིས་གནང་བ་དང་མི༌འདྲ། ཁྱོད་ཅག་གི་སེམས་མི་སྐྱོ་མི་འཇིགས་པར༌གྱིས།

( ཡོ་ཧ་ནན། 14:27 )