વર્જિત ફળ – સારા અને ખરાબનું જ્ઞાન આપણા માટે કેમ નહોતું?

ઈશ્વરે આદમ અને હવાને સારા અને ખરાબનું જ્ઞાન શા માટે વર્જિત કર્યું? આ વિચિત્ર લાગે છે, કારણ કે જીવનના વૃક્ષનાં ફળ પણ તેમને માટે વર્જિત નહોતાં. અને જ્યારે ઈશ્વરે આ ફળ ખાવાની મનાઈ કરી, ત્યારે તેમણે સમજાવ્યું કે તે કેવા પ્રકારનું વૃક્ષ હતું. ઈશ્વર ઇચ્છતા હતા કે આપણે જાણીએ કે તેમણે સારા અને ખરાબનું જ્ઞાન આપણા માટે રાખ્યું નહોતું. શા માટે?

16યહોવાહ ઈશ્વરે તેને આજ્ઞા આપી અને કહ્યું, “વાડીના દરેક વૃક્ષનું ફળ ખાવાને તું સ્વતંત્ર છે. 17પણ સારું અને નરસું જાણવાના વૃક્ષનું ફળ તું ખાઈશ નહિ, કેમ કે જે દિવસે તું તે ખાશે, તે જ દિવસે નિશ્ચે તારું મરણ થશે.”

( ઉત્પ 2:16-17 )

ચાલો જોઈએ કે વર્જિત ફળ ખાધા પછી તરત જ ઈશ્વર સાથેની તેમની સૌપ્રથમ મુલાકાતમાં આદમ અને હવા સાથે શું બન્યું.

8દિવસના ઠંડા પહોરે વાડીમાં પ્રભુ ઈશ્વરનો ચાલવાનો અવાજ તેઓના સાંભળવામાં આવ્યો, તેથી તે માણસ તથા તેની પત્ની પોતાને પ્રભુ ઈશ્વરના સાનિધ્યથી દૂર રાખવા માટે વાડીના વૃક્ષોની વચમાં સંતાયાં.

9યહોવાહ ઈશ્વરે આદમને હાંક મારી કે, “તું ક્યાં છે?” 10આદમે કહ્યું કે, “મેં વાડીમાં તમારો અવાજ સાંભળ્યો અને હું ગભરાયો. કેમ કે હું વસ્ત્રહીન છું. તેથી હું સંતાઈ ગયો.”

( ઉત્પ 3:8-10 )

સારા અને ખરાબના જ્ઞાને આદમ અને હવાને ઈશ્વરથી સંતાવા પ્રેર્યા. જેમણે તેમને સર્જ્યા, જેમણે તેમને પ્રેમ કર્યો અને તેમની સંભાળ રાખી, તેમનાથી જ સંતાવા…

આના પરથી જ આપણે જોઈએ છીએ કે આ વધારાના જ્ઞાનથી ઉદ્ભવેલો પહેલો પ્રતિભાવ બહુ આશાસ્પદ નહોતો. આદમ અને હવા, આપણે સૌની જેમ જ, આટલા શક્તિશાળી જ્ઞાન માટે ફક્ત તૈયાર નથી.

સારા અને ખરાબના જ્ઞાનને કારણે આપણે ઈશ્વરને અનુસરવાને બદલે પોતાના નિર્ણય પર આધાર રાખતા થયા. ઈશ્વર જે બધું જુએ છે તે આપણે જોતા નથી, અને આ જગતની બાબતોની સંપૂર્ણ જટિલતા અને પરસ્પર જોડાણને આપણે સમજી શકતા નથી. આપણામાં ઈશ્વરનું જ્ઞાન અને સમજ નથી, છતાં આપણે જે જોઈએ છીએ તેના પર તરત જ “સારું” અને “ખરાબ”ની મહોર મારી દઈએ છીએ…

9“કેમ કે જેમ આકાશો પૃથ્વીથી ઊંચાં છે, તેમ મારા માર્ગો તમારા માર્ગોથી અને મારા વિચારો તમારા વિચારોથી ઊંચા છે.

( યશા. 55:9 )

આ ચોરાયેલું જ્ઞાન આપણને આંધળા બનાવે છે અને ઈશ્વરના સંદેશથી દૂર રાખે છે. જ્યારે આપણે “ખરાબ” સમાચાર કે આપણી વિરુદ્ધની ટીકા સાંભળીએ છીએ, ત્યારે આપણા માટેનો તેનો સંદેશ સમજવાનો પ્રયત્ન કરવાને બદલે આપણે તે ખરાબ વ્યક્તિનો ન્યાય કરીએ છીએ.

52પ્રબોધકોમાંના કોને તમારા પૂર્વજોએ સતાવ્યા નહોતા? જેઓએ તે ન્યાયીના આવવા વિષે અગાઉથી ખબર આપી હતી તેઓને તેઓએ મારી નાખ્યા; અને હવે તમે, જેઓને સ્વર્ગદૂતો દ્વારા નિયમ મળ્યો, પણ તમે તે પાળ્યો નહિ.

( પ્રે.કૃ. 7:52 )

રાજા દાઉદ એવા થોડા અપવાદોમાંના એક હતા, જે ખરેખર ઈશ્વરનું વચન સાંભળતા હતા, પછી ભલે તે સારી કે ખરાબ વ્યક્તિ પાસેથી આવતું હોય અને ભલે તે વાણી કોઈ પણ સ્વરૂપમાં હોય.

5જયારે દાઉદ રાજા બાહુરીમ પહોંચ્યો, ગેરાનો દીકરો શિમઈ શાઉલના કુટુંબનો હતો તે ત્યાંથી બહાર આવ્યો. તે શાપ આપવા લાગ્યો.

7શિમઈએ શાપ આપતા કહ્યું, “હે ખૂની તથા બલિયાલના માણસ! દૂર જા, અહીંયાથી જતો રહે,

9પછી સરુયાના દીકરા અબિશાયે રાજાને કહ્યું કે, “આ મરેલો કૂતરો મારા માલિક રાજાને શા માટે શાપ આપે છે? કૃપા કરી મને જવા દે કે હું તેનું માથું કાપી નાખું.”

10પણ રાજાએ કહ્યું કે, હે સરુયાના દીકરાઓ, મારે તમારી સાથે શો સંબંધ છે? કદાચ તે મને શાપ આપે કેમ કે ઈશ્વરે તેને કહ્યું છે કે ‘દાઉદને શાપ આપ.’ તેથી કોણ કહી શકે કે, ‘તું શા માટે રાજાને શાપ આપે છે?”

( 2 શમુ. 16:5,7,9,10 )

ખરેખર, દાઉદ ઈશ્વરને ગમે તેટલા પ્રિય હતા, છતાં તે એક ખૂની હતા, જેમને પાછળથી ઈશ્વર માટે મંદિર બાંધવાની પરવાનગી મળી નહોતી.

8પણ યહોવાહે મારી પાસે આવીને કહ્યું કે, ‘તેં ઘણું લોહી વહેવડાવ્યું છે અને તું ઘણાં યુદ્ધો લડ્યો છે. તું મારા નામને માટે ભક્તિસ્થાન બાંધશે નહિ કારણ કે તેં, પૃથ્વી પર, મારી નજર સમક્ષ, ઘણું લોહી વહેવડાવ્યું છે.

( 1 કાળ. 22:8 )

જો આપણે વધુ ઊંડાણથી જોઈએ, તો સમજાશે કે આપણને પણ જે મળવું જોઈએ તે જ મળે છે, પછી ભલે તે સારી કે ખરાબ વ્યક્તિ દ્વારા આવે. હા, આપણા માટે સ્વાભાવિક છે કે આપણે પગારવધારો ન આપનાર આપણા મેનેજરને, અકસ્માતમાં આપણને ટક્કર મારનાર બીજા ડ્રાઇવરને, આપણી કોઈ કિંમતી વસ્તુ ચોરી જનાર ચોરને, કે જેની સાથે આપણો ઝઘડો થયો હોય તે બીજી વ્યક્તિને દોષ આપીએ… આપણે હંમેશાં બીજામાં જ બૂરાઈ જોઈએ છીએ, અને જે બન્યું તેની પાછળ આપણા માટેનો સંદેશ જોતા નથી…

3 તું તારા ભાઈની આંખમાંનું ફોતરું ધ્યાનમાં લે છે, અને તારી પોતાની આંખમાંનો ભારોટીયો કેમ જોતો નથી?

( માથ. 7:3 )

હા, જો કોઈ ખરાબ વ્યક્તિ કે ખરાબ સંજોગો આપણી પાસે આવ્યા હોય, તો તે ક્યારેય કારણ વગર નથી હોતું.

13માટે હવે, તમારાં આચરણ અને કૃત્યો સુધારો અને તમારા ઈશ્વર યહોવાહનું કહ્યું સાંભળો, તો કદાચ તમારા પર જે વિપત્તિ લાવવા યહોવાહ બોલ્યા છે તે વિષે તેઓ પશ્ચાતાપ કરે.

( યર્મિ. 26:13 )

તો ચાલો, જેમને આપણે દુષ્ટ માનીએ છીએ તેમનો ન્યાય કરવાથી દૂર રહીએ, અને આપણા સ્વર્ગીય પિતાનાં સાચાં સંતાનો તરીકે સૌ પર પ્રેમનો પ્રકાશ પાથરીએ.

45એ માટે કે તમે સ્વર્ગમાંના તમારા પિતાના દીકરા થાઓ. કેમ કે તે સૂર્યને દુષ્ટ તથા ભલા પર ઉગાવે છે અને ન્યાયી તથા અન્યાયી પર વરસાદ મોકલે છે.

( માથ. 5:45 )

હવે આપણે જોઈએ છીએ કે દરેક જ્ઞાન સાથે મોટી જવાબદારી આવે છે. ભલે આપણને સારા અને ખરાબનું જ્ઞાન મળ્યું, પણ તેનો યોગ્ય ઉપયોગ કરવા માટેની પૂરી સમજ આપણી પાસે નથી. તેથી ચાલો, આપણે ન્યાય કરવાથી દૂર રહીએ અને આપણે જે કંઈ કરીએ તેમાં ઈશ્વર પર આધાર રાખીએ.

5તારા પૂર્ણ હૃદયથી યહોવાહ પર ભરોસો રાખ

અને તારી પોતાની સમજણ પર આધાર રાખીશ નહિ.

6તારા સર્વ માર્ગોમાં પ્રભુનો અધિકાર સ્વીકાર

અને તે તારા માર્ગો સીધા કરશે.

( નીતિ. 3:5-6 )