Je, Yesu ndiye Masihi?

Mara nyingi tunasikia habari za Yesu na kwamba alituokoa kwa kufa msalabani kwa ajili yetu. Na kila mtu anayemwamini ana uzima wa milele.

Kuokoa maisha yetu – hiyo ndiyo kazi ya Masihi anayetarajiwa... Lakini je, Yesu ndiye Masihi wa kweli, au tumngoje mwingine?

Habari nyingi kuhusu yule mteule, yule atakayetuokoa sisi sote, tunazipata katika kitabu cha nabii Isaya, aliyeishi na kutoa unabii karibu karne ya nane kabla ya Kristo. Hiyo ilikuwa takriban miaka 700 kabla ya Yesu kuzaliwa.

1 Chipukizi litatokea kutoka shina la Yese,

kutoka mizizi yake Tawi litazaa tunda.

2 Roho wa Bwana atakaa juu yake,

Roho wa hekima na wa ufahamu,

Roho wa shauri na wa uweza,

Roho wa maarifa na wa kumcha Bwana

3 naye atafurahia kumcha Bwana.

Hatahukumu kwa yale ayaonayo kwa macho yake,

wala kuamua kwa yale ayasikiayo kwa masikio yake,

4 bali kwa uadilifu atahukumu wahitaji,

kwa haki ataamua wanyenyekevu wa dunia.

Ataipiga dunia kwa fimbo ya kinywa chake,

kwa pumzi ya midomo yake atawaua waovu.

5 Haki itakuwa mkanda wake

na uaminifu utakuwa mshipi kiunoni mwake.

( Isaya 11:1-5 )

Tunatarajia kwamba Masihi atakuwa mzao wa mfalme Daudi…

1 “Huyu hapa mtumishi wangu, ninayemtegemeza,

mteule wangu, ninayependezwa naye;

nitaweka Roho yangu juu yake,

naye ataleta haki kwa mataifa.

2 Hatapaza sauti wala kupiga kelele,

wala hataipaza sauti yake barabarani.

3 Mwanzi uliopondeka hatauvunja,

na utambi unaofuka moshi hatauzima.

Kwa uaminifu ataleta haki,

4 hatazimia roho wala kukata tamaa,

hadi atakaposimamisha haki juu ya dunia.

Visiwa vitaweka tumaini lao katika sheria yake.”

5 Hili ndilo asemalo Mungu, Bwana,

yeye aliyeziumba mbingu na kuzitanda,

aliyeitandaza dunia na vyote vinavyotoka humo,

awapaye watu wake pumzi,

na uzima kwa wale wanaoenda humo:

6 “Mimi, Bwana, nimekuita katika haki;

nitakushika mkono wako.

Nitakulinda na kukufanya kuwa agano

kwa ajili ya watu

na nuru kwa Mataifa,

7 kuwafungua macho wale wasioona,

kuwaacha huru kutoka kifungoni wale waliofungwa,

na kuwafungua kutoka gerezani

wale wanaokaa gizani.

( Isaya 42:1-7 )

Hapa tunaona kwamba “mtumishi” atakuwa mnyenyekevu, hatapaza sauti yake hadharani, atafungua macho ya vipofu…

Isaya anasema nini kingine kumhusu katika kitabu chake? Masihi atatendewaje na watu wengine? Nini kilimpata, na hilo lina maana gani kwetu? Ili kujibu hilo, Isaya anasonga mbele hadi wakati ujao na kuzungumza nasi moja kwa moja, kuhusu Masihi ambaye tayari tumemkataa.

1 Ni nani aliyeamini ujumbe wetu,

na mkono wa Bwana umefunuliwa kwa nani?

2 Alikua mbele yake kama mche mwororo

na kama mzizi katika nchi kavu.

Hakuwa na uzuri wala utukufu wa kutuvutia kwake,

hakuwa na chochote katika sura yake cha kutufanya tumtamani.

3 Alidharauliwa na kukataliwa na wanadamu,

mtu wa huzuni nyingi, ajuaye mateso.

Kama mtu ambaye watu humficha nyuso zao,

alidharauliwa, wala hatukumhesabu kuwa kitu.

4 Hakika alichukua udhaifu wetu

na akajitwika huzuni zetu;

tulidhania kuwa ameadhibiwa na Mungu,

naye akapigwa sana na kujeruhiwa.

5 Lakini alijeruhiwa kwa ajili ya makosa yetu,

alichubuliwa kwa ajili ya maovu yetu;

adhabu iliyotuletea sisi amani ilikuwa juu yake,

na kwa majeraha yake sisi tumepona.

6 Sisi sote, kama kondoo, tumepotea,

kila mmoja wetu amegeukia njia yake mwenyewe,

naye Bwana aliweka juu yake

maovu yetu sisi sote.

7 Alionewa na kuteswa,

hata hivyo hakufungua kinywa chake;

aliongozwa kama mwana-kondoo

apelekwaye machinjoni,

kama vile kondoo anyamazavyo mbele ya wao wamkataye manyoya,

hivyo hakufungua kinywa chake.

8 Kwa kuonewa na kuhukumiwa aliondolewa.

Nani awezaye kueleza kuhusu kizazi chake?

Kwa maana alikatiliwa mbali na nchi ya walio hai,

alipigwa kwa ajili ya makosa ya watu wangu.

9 Wakamfanyia kaburi pamoja na waovu,

pamoja na matajiri katika kifo chake,

ingawa hakutenda jeuri,

wala hapakuwa na hila kinywani mwake.

10 Lakini yalikuwa ni mapenzi ya Bwana

kumchubua na kumsababisha ateseke.

Ingawa Bwana amefanya maisha yake

kuwa sadaka ya hatia,

ataona uzao wake na kuishi siku nyingi,

nayo mapenzi ya Bwana

yatafanikiwa mkononi mwake.

11 Baada ya maumivu ya nafsi yake,

ataona nuru ya uzima na kuridhika;

kwa maarifa yake, mtumishi wangu mwenye haki

atawafanya wengi kuwa wenye haki,

naye atayachukua maovu yao.

12 Kwa hiyo nitamgawia sehemu miongoni mwa wakuu,

naye atagawana nyara pamoja na wenye nguvu,

kwa sababu aliyamimina maisha yake hadi mauti,

naye alihesabiwa pamoja na wakosaji.

Kwa kuwa alichukua dhambi za wengi,

na kuwaombea wakosaji.

( Isaya 53:1-12 )

Tunaona kwamba Masihi aliyekataliwa na kudharauliwa alikufa kwa ajili ya dhambi zetu, kama mwana-kondoo anayepelekwa machinjoni. Alikufa bila uzao, lakini bado “ataishi siku nyingi” na “ataona uzao wake”. Huenda hii inamaanisha kwamba Masihi angefufuka baada ya kifo chake, duniani au mbinguni, na angekuwa na watoto, wa kimwili au wa kiroho.

Sasa, kama zoezi kwako mwenyewe, na ili uamue kama Yesu ndiye Masihi anayetarajiwa, soma shuhuda kuhusu Yesu Kristo kutoka kwa Mathayo, Marko na Yohana, ambao walikaa sehemu kubwa ya maisha yao pamoja na Yesu, na kutoka kwa tabibu Luka, aliyekusanya kwa uangalifu mkubwa habari za maisha ya Yesu Kristo Mnazareti…